開始推 sak ê 催生台語公共電視台活動，治第 1 波尋民間團體鬥支持聯署 ê 這段時間內, chōe chōe民間團體朗足骨力 teh 鬥贊聲。到第 2 波遊說立委聯署 ê 時陣，名單內底煞出現中國國民黨 ê 立委。雖罔有人出來反對，不過多數人朗向望有 1 ê 台語電視台，對這層代無表示意見。問題--是京日發生即年譀古 ê 代志，真正 hŏng 袂吞忍--得。
對本土語言按盞 hŏng 滅無 ê 歷史理路通知，朗是中華民國 kap 中國國民黨一手做成 ê。到 taⁿ in ê 一切罪行 mā 朗野未受審判，尋 in 來鬥支持根本是對台灣人 ê 侮辱，着閣卡免講治公開 ê 網路頂懸 kăi 說多謝，這是共台灣人 ê 尊嚴 tàn 治塗踏。
爭取台語電視台有 i ê 政治意義治--leh， 是卜共 lán ê 物件討返來，不是 teh 求人施捨。催生台語電視台 ê 目的 mā 不是干焦成做語言平權 kap 文化保存--niā，治閣恰高 ê 層次是卜起造台灣人 ê 主體，建立國家，脫離 hŏng 殖民 ê 監牢。對這 ê 層次 loeh 看，koh 卡按怎 mā 袂得去尋 in 鬥支持。退出聯署是針對催生聯盟為着卜乎運動成功，choăn 不顧這背後 lán 真正卜追求 ê 價值。
根據以上所講--ê，阮決定卜退出催生台語公共電視台 ê 聯署。成做 1 ê 有尊嚴 ê 台灣人 ài 有台灣人 ê 氣魄。為着卜達成階段性 ê 目標，煞放棄台灣人 ê 性，這種運動手段，無法度 hŏng 接受--得，mā 無法度支持。
0 意見:
張貼留言