今仔日是 228 大屠殺滿七十年 ê 日子，FETN蠻番島嶼社 khiā tī 解殖 獨立 建國 主張 ê 立場，除了為 tio̍h 這个事件哀悼以外，也主張以下三點，希望 lán 會當做伙一步一步行向 lán 家己 ê 未來。
一、228 事件是中華體制對台島人民 ê 屠殺
若說 tio̍h 228，中華民國 ê 課本 lóng 會 kā lán 講二月二十七彼日“ 查緝私菸（華）” ê 代誌，若無就是用“ 族群衝突” 抑是“ 官逼民反（華）” 等等 ê 說法來扭曲 228 大屠殺 ê 本質。
228 事件就是屠殺，不管你反、抑者是無反，中華民國就是欲殺！Tī 七十年前 ê 二月二十八號，台島人民為 tio̍h 前一日 ê 代誌去到行政長官公署（華），現在 ê 行政院，來和平請願，siáⁿ-mih 武器 lóng 無 chah ê 一陣人，煞是 hō͘ 憲兵開槍來掃射——這才是 228 大屠殺真正 ê 起點——也是 lán 今仔日 ê 遊行選擇 tī 行政院起行 ê 原因。
中華民國透過 228，有計劃 ê kā 本島 ê 知識份子、地方頭人 lóng 總清掃了了，來鞏固伊家己 tī 台灣島 ê 統治。一直到今仔日，雖然總是有人愛講 228 已經是過去 ê 代誌，但是 228 kám 真正過去--ah？Góa 不知影，góa 唯一確定 ê 是屠殺一直 teh 進行，從來就無停止過……差別只是七十年前用 ê 是看會 tio̍h 血 ê 刀子、銃、銃子，hō͘ 人死去，未當閣喘氣；現子時用 ê 是看未 tio̍h 血 ê 媒體、教育 kah 政治，hō͘ lán 失去家己 ê 語言、文化 kah 歷史，lán 閣會使喘氣，問題是 lán kám 真正閣活--leh？
二、中華民國體制 kah 伊 ê 支持者必須受 tio̍h 徹底 ê 清算
Ùi 228 大屠殺發生到 chit-má，七十年過去了，ùi 1987 年鄭南榕 Nylon 打破當時 ê 禁忌舉辦紀念遊行也已經三十冬，彼時 in 咧討真相、討兇手，tī 2017 年 ê 現今，lán 猶原無任何進展，揣無真相、也揣無兇手。
Siuⁿ 久--ah，是應該精神 ê 時陣--ah！只要中華民國閣 tī 本地存在 ê 一工，所謂 ê 民主、自由 lóng 是建立 tī 台島人民 hông 禁止講出來、講未出來，只好吞忍落腹 ê 血 hâm 目屎頂頭， lóng 是假--ê， lóng 是騙 lán--ê。
Lán 今仔日舉 tio̍h 出征旗，就是欲認清中華民國是 lán 台島人民 ê 敵人，lán 必須徹底清算中國國民黨、瓦解中華民國，才有法度真正看 tio̍h 歷史真相、看清元兇，誠實 ê 面對這个島嶼頂頭 ê 恨 kah 傷痛，重新整理一切造成傷害 ê 制度，hō͘ 大家共同來討論，才是痊癒 ê 開始。這不是“ 撕裂族群（華）”，是孔嘴若欲好起來，一定愛經過--ê ——清創 ê 過程。
三、歸屬 tī 台灣島，kā 遮當作是家己 ê 認同 ê 人，定 to̍h-tio̍h 起身來建立 lán 家己 ê 國家
1987 年解嚴進前，本地社會 hông 禁止談論 228；Tī 解嚴以後，本地社會足 sè-jī、足好禮仔去 “客觀的（華）” 認識 228，足奇怪--ê， tio̍h 親像 228 不是 “ Lán ê 代誌、Lán ê 歷史”。
確實，因為目前為止，中華民國猶閣寄生 tī 這个島嶼，伊當然不准 lán 感受 lán 家己 ê 痛，無就是“ 隨便踩上一個受害者的位置（華）”，因為 lán 若知影痛，就會發現 lán 身軀頂 ê 孔嘴， lóng 是中華民國親手 gia̍h 刀子一刀一刀 chha̍k 出來 ê --ah。
中華民國是這个島嶼頂懸，上大上有害 ê 寄生蟲，伊不是 lán ê 國家，lán 需要建立家己 ê 國家。
落尾，FETN蠻番島嶼社想欲講，中華寄生 島嶼淪陷 民國不除 何來共生，只有清算中華民國體制，建立 lán 家己 ê 國家，才有真正 ê 民主 kah 自由，228 這種屠殺才未閣發生，這个島嶼也才有共生 ê 可能，希望 lán 大家同齊來 phah 拚，多謝大家。
0 意見:
張貼留言